英超球隊禮拜三喺歐聯除咗熱刺威水外，曼城同利物浦都唔執輸！其中英超意甲一哥大戰，曼城射手阿古路唔只做番正選，更加喺下半場入波，幫曼城作客4:2贏咗拿玻里，提早兩輪拎到F組出線資格外，阿古路自己仲打破埋藍月亮隊史的入波紀錄，威上加威！
其實曼城今場唔係踢得咁順，上半場先俾拿玻里嘅恩斯治尼破門，反先後又俾拿玻里追平2:2，好彩有阿古路救駕射入曼城今場比賽嘅第三球，加上史達寧補時入波先至贏到4:2。而阿古路今場嘅士哥亦係佢效力曼城嘅第178個入波，打破曼城名宿艾歷布祿保持咗成78年嘅177球紀錄，成為曼城隊史入球王。
至於上場歐聯畀利物浦炒七粒嘅馬里博爾，周三作客晏菲路刻意加強防守，但為保榜首優勢嘅紅軍，最終亦喺下半場憑穆罕默德沙拿、安利簡恩及史杜列治先後建功大勝3:0，以四戰八分排榜首，下輪作客搞掂埋西維爾就可以出線16強。
