Regine：「L知唔知點解？」
Ella：「黐L線！」
Regine：「What 7 you say? 7和L都係粗口！」
Ella：「What the fxxk are you saying?」
Regine：「啱喇！」
以上係香港女生Regine同韓國女生Ella，上廣東話堂嘅對話，Regine話，「教粗口唔係一件壞事，只係教韓國人點解咁講，認識更多香港地道文化！」
「原來真係有韓國人願意花時間學廣東話，好開心可以為廣東話出一分力。」Regine話兩年前為咗學韓文而搬到韓國，o依家讀緊碩士，機緣巧合下認識到想學廣東話嘅韓國人。Regine除咗教粗口，亦會教潮語，例如「廢青」，仲會教廣告或電影對白，例如「你今日飲咗未呀？」、「做人無夢想同條鹹魚有咩分別呀？」Regine話韓國人鍾意睇星爺嘅戲，所以會覺得好得意。
韓國女生Ella係Regine其中一個學生，暫時學咗嘅廣東話都好實用，例如「靚仔」、「o依個幾錢呀？」、「我無錢，平啲！」、「麥當勞叫M記」、「7-Eleven叫7仔」等，佢話覺得廣東話好得意。
點解韓國人想學廣東話呢？Regine話最大原因係另一半係香港人，其次係為興趣，「覺得廣東歌好好聽」，又有啲韓國人想嚟香港發展，「香港公司嘅氣氛比韓國好，活潑啲，無咁死板！」
韓國都有廣東話嘅教科書，第一課係教「唔該」，不過Regine話通常第一堂係教睇聲調，教埋拼音，先學單字。雖然廣東話係Regine嘅母語，但係要清楚解釋都唔容易，「好似『多謝』同『唔該』係有分別嘅，我就用情境嚟解釋，喺接受別人祝福嗰陣講『多謝』，喺要人幫忙嗰陣講『唔該乜乜乜...』，以『唔該』開頭。」
Regine話都有教學相長嘅時候，好似「磅水」、「回水」、「五嚿水」呢啲，韓國人會問點解全部都係水，Regine話由細到大都係咁講，都無諗過點解，於是自己查吓，再話返畀韓國人知「水為財」。
出走韓國兩年，Regine進修韓文，用韓文讀碩士，都無話唔鬼記得廣東話，亦冇忘記自己係香港人，「我同韓國人介紹自己，會話『我係香港人』，有韓國人會話『咁你即係中國人啦！』咁我會解釋返我哋係香港人，有自己嘅母語，係講廣東話嘅！」
《仙遊首爾》重溫：
http://hk.apple.nextmedia.com/enews/animation/kfans/
記者：阿仙
攝影：峰
編審：Kaman
更多娛聞，喺晒《娛果》
http://fb.com/appledailyent