粉紅色自古而嚟都係可遇不可求，正因呢種神秘感，過往令唔少人類都渴望能夠窺探一下。
去到11月5日星期日，莎莎呢個本地知名化妝品牌，就為大家揭開呢種顏色嘅神秘面紗，因為呢日就係周圍充滿粉紅色嘅莎莎婦女銀袋日。
而呢個化妝王國嘅主持人郭少明亦親身向外宣佈呢項盛事：「同我哋一齊參與莎莎婦女銀袋日，欣賞我哋上年起升格為國際賽事嘅銀袋賽。」
其實除咗有場預計好激烈嘅三級賽莎莎婦女銀袋（1800米）外，莎莎集團更從遠古召喚充滿仙氣，喺《新射鵰》入面嘅穆念慈嚟到沙田馬場，仲化名叫孟子義，成為莎莎形象大使，仲早排影咗幾輯沙龍，簡直就同剛贏二級賽嘅「美麗傳承」一樣咁正，睇耐啲都忍唔住想同佢，影多幾張相。
除咗有美人同駿馬喺當日相伴之外，莎莎希望入場嘅馬迷，都能夠投入呢場美麗盛事，所以向每位參加者都派發金色馬型紀念襟針一個，睇嚟要着到似去飲宴嘅場合咁，先可以入場。
11月5日沙田馬場約定你，呢個神秘粉紅色國度，仲有好多嘢等緊馬迷去發掘。