幾星期前在上海總會食飯，碰到成班退休人士，其中投資K係投資高手，順口問佢有乜股票好買，投資K話：「我只係買埋一堆dividend stocks（股息股），唔啱炒，只求穩定派息，活躍投資者唔多啱嘅。我已經退休，一個禮拜打三場波，再冇心機去追逐市場異動股或甚麼增長股了。退咗休，投資要保守啲嘅。」都好，唔理市場波動便可專心打波，一個禮拜打三場波，少不免常往內地，好多年前佢已在東莞近高球場買咗別墅，現在就每逢周末都住在東莞。
打高球都要有朋友一齊先至好玩，投資K話以前打波順便嘜客，有時又俾股票經紀嘜佢，一路打波一路傾生意，現在就真正100%純打波，基金經理與股票經紀少咗搵佢，所以波友變番以校友為主，打波更輕鬆。但因與中大校友打得多，竟然產生鬥心，希望明年能夠打敗港大校友隊，贏番一次牙骹。乜中大校友成日輸嘅咩？投資K話：「港大校友高手如雲，我地分AB隊作賽，A隊對A隊呢，大家咬得好實，但港大B隊亦實力雄厚，連銀行界（其實係金管局）出名嘅好手彭醒棠，在港大校友隊都要打Bteam，可見港大好手太多，板凳實力雄厚，我地中大嘅B隊唔夠砌。」
哦，高球好手幾難橫空而出，特別係業餘隊伍，聽投資K咁講，中大校友高爾夫球隊將來還是有排輸畀港大校友隊。同賓架P講起，叫佢加入中大校友隊，佢耍手擰頭，話打得高球太多，年紀大咗就腰骨有事，膊頭有事，臀部有事，最近就見到三位高球發燒友，均是銀行界商界名人，要入院做knee replacement，hip replacement，另一位就腰痛背痛，坐立不安。賓架P話：「我只係鍾意間中玩吓嘅啫，要好似投資K咁一個禮拜打三日，仲要有鬥志向港大校友隊挑戰，容乜易傷身！」講到打波，左丁山就只係識睇識講唔識打，永遠係花生友，只係畀一種波考起，就係英國人嘅cricket（板球），左丁山到現在仍然冇法子明白板球如何得分失分及好波竅門，美國佬棒球就容易明白好多，最近美國棒球World Series由LA對Houston，就夠晒精彩刺激，肥仔K係UCLA校友，更加肉緊非常，此文見報之日，應已分出勝負，無論邊隊贏，2017 World Series將成為難忘經典。