因美劇《怪奇物語》（Stranger Things）而走紅嘅13歲童星Millie Bobby Brown最近接受訪問，竟然自爆原來一直以嚟一邊耳失聰，佢指自己天生一邊耳已經有聽力問題，到慢慢長大就變到完全失聰，但呢個並冇成為佢追求夢想嘅障礙。「我開始唱歌，我唔在乎唱得幾難聽，因為我做緊鍾意做嘅嘢。你唔需要好叻唱歌、跳舞或者做戲，如果你鍾意做，你好享受去做，冇人會阻到你。」
佢仲講到自己拍上一季《怪奇物語》時點運用其他感覺去演戲：「你可以用你嘅表情講嘢，其實要表達好嬲、好唔開心都好簡單，只要用表情就可以。」