特首林鄭月娥早前落柯打，要求政治助理至少到訪3間學校分享。之前俾人叫錯做符「傅」富嘅運房局政助符傳富噚日好開心咁話，兩星期內已經極速達標，自言預計未來要着重處理一地兩檢問題，所以呢兩星期就先行急急腳完成到訪學校嘅「硬任務」。佢話好高興見到學生對唔同方面嘅政策都有興趣，但最尷尬係有人重提啲陳年舊事，問本身係8A狀元嘅佢點可以爭取好成績，自己惟有老老套套咁叫學生勤力啲囉。
至於創新及科技局政助張曼莉至今只到訪咗一間學校，有學生問佢從政者係唔係要「擦鞋」先可以上位？佢就提醒學生擦唔擦鞋係個人選擇，而即使擦鞋都唔代表可以上位喎！