除咗股票有深港通，聽聞「黃金深港通」周五（11月3日）都會開通，金銀業貿易場當然要賀一賀佢。
金銀業貿易場本周五就book咗會展搞大party，除咗係「黃金深港通」啟動禮之餘，仲會舉行埋第45屆理監事會就職典禮，聽聞連特首林鄭都會畀面親臨主禮，相信到時咁多金融界人士到場，一定星光閃閃。
不過，大會好似怕大家唔夠閃，除咗要formal dressing之餘，仲話大家要戴埋金、銀配飾，開個bling bling party，唔知到時特首林鄭會有乜行頭呢？
開party當然唔少得抽獎，今次獎品都好豐富，幸運大獎係金銀業貿易場一両9999金條、另外仲有3部iphone8，同3部iPad Pro㖭。
李華華