立法會內唔少單身盛女，包括三條一正日生日嘅工聯會麥美娟（Alice），噚日係Alice嘅46歲生日，但因為立法會打緊一地兩檢議案大仗，作為建制派一分子嘅Alice，當然都要坐定定開會，冇得放假休息啦。但工聯會新界西嘅兄弟就好有心，一早已經送花畀佢同佢提早賀壽；至於立法會議員同事呢，亦有趁會議小休期間送上生日蛋糕同鮮花，但因為撞正立法會拉布戰，搞到佢今年嘅生日，只係得15分鐘慶祝，過程非常之趕。
Alice話今年嘅生日願望，就係立法會可以順利通過支持高鐵一地兩檢，同埋唔好再點人數同拉布，嘩，生日都要咁政治正確？至於慶祝活動，佢就話8點收工後就會即刻趕返屋企，因為佢4歲嘅姪女等住同佢一齊慶祝喎。