現今世界講求即食，乜都要快靚正！秒秒鐘幾十萬上落嘅英超，就更加唔會客氣，炒領隊簡直係家常便飯，而且仲有好多換人即work嘅例子。今季英超有水晶宮同李斯特城（圖）搵到新領隊，而愛華頓就由安斯禾夫頂住先，結果？水晶宮鹹魚翻生，李城都脫胎換骨，呢啲例子自然會引到更多管理層想手起刀落。
係人都知，換領隊會令隊波由結構到人心都唔穩定，好難建立一個穩定班底咁長治久安，不過英超呢個咁現實同一沉百踩嘅世界，最緊要生存咗先，即係唔好降班！
李城上季炒咗雲尼亞里即刻反彈，而今季奇治莎士比亞坐正見真章，壓前踢搶攻波同李城班底本末倒置，一換佩爾改番雲帥式嘅穩守突擊，立即搞掂愛華頓！李城同奪冠時嘅最大分別，都係冇咗尼高路簡迪，嗰道中場屏障差一大截，不過要做支穩陣中游隊冇難度。
水晶宮季初俾法蘭迪保亞嘅技術型化搞到水土不服，鶴臣救亡嘅方法都係靠晒韋費特沙夏，不過班波喺主場連續兩場入兩球，打低車路士之餘又喺落後兩球下追平韋斯咸，總算有鬥志有拼勁，睇到呢兩隊波好受新帥效應嘅正面刺激。
對於一堆中型班嚟講，講咁多理想真係嘥口水，唔通佢哋會想衝擊歐聯咩？就算李城爆冷捧盃都係爆胎之作。講到尾，佢哋最緊要都係留喺英超，所以喺李城同水晶宮前車可鑒下，今季手起刀落嘅勢隨時更勁！
文：飛鴻