英超秒秒鐘幾十萬上落，講到一分不能失寸土必爭咁，但係咪成績唔好就一定炒教練先work，小弟覺得唔同案例好難一概而論，但好似近年熱刺班管理層，肯一直畀普捷天奴機會，先至有今日躋身爭標之列嘅局面。
自Big 6個名銜出現後，熱刺一直都係掹車邊做「六弟」，直至普捷天奴（圖）上任後，成個情況截然不同。其實，記得普帥初初由修咸頓嚟到嗰季，熱刺都唔係特別醒神，頭九輪英超得三勝二和四負，去到聖誕先叫有好轉。好多人開始質疑佢領軍能力，覺得佢教「聖人」就得，教一支相對大規模小小嘅球會就見底，但老細利維近年可能轉死性，又或唔想自打嘴巴，對普帥無比信任，結果𠵱家可以話修成正果，成為爭標分子之一。
將熱刺套落愛華頓、李斯特城或水晶宮身上，可能有啲唔公平，因為普捷天奴至少未試過帶到熱刺跌落降班漩渦，如果真係教得咁差，利維可能都冇情講。
不過，小弟始終覺得季初炒帥係一個非常衝動嘅決定，因為好多嘢都未睇定；再以上季為例，邊個估到干地帶領嘅車路士，會喺連敗畀利物浦同阿仙奴後反彈，豪取13連勝，最後仲贏埋英超，小弟攞呢個例子，都係想替班領隊伸吓冤，尤其係朗奴高文，上年先幫愛華頓爭返上第七，今年就要走人，你唔畀佢喺11月突然反彈？要換帥等到12月未遲啦！
文：盧卡東尼