聯合國教科文組織（UNESCO）噚日公佈亞太區文化遺產保護獎得獎名單，灣仔藍屋（圖）建築群活化計劃得到最高級別嘅卓越大獎。評審話藍屋係城市保育嘅成功例子，灣仔區發展迅速，樓市壓力亦非常大，但租戶、社會工作者同保育人士合力拯救呢個草根社區。評審相信由公民倡導、由下而上嘅保育經驗，可以啟發其他面對類似情況嘅城市。
今屆參與競逐嘅保育項目有43個咁多，其中16個獲獎。灣仔藍屋建築群喺2000年獲古物諮詢委員會列為一級歷史建築，目前係全港首個以「留屋留人」方式活化嘅歷史建築。至於藍屋活化計劃由建於20至50年代嘅3幢唐樓組成，其中藍屋以磚木結構為主，係本港僅存有陽台嘅唐樓。