騰訊(700)「親生仔」閱文（772）嗰頭截飛，呢頭誠哥有份投資嘅雷蛇（1337）就開招，其他同期招股嘅新股要突圍而出，真係要諗諗計。好似今日開招嘅新興印刷（1975）就玩名人效應，搵嚟「廚神」謝霆鋒拍片，祝賀公司上市，令華華好驚喜。
據聞，霆鋒正喺外地做緊拍攝工作，所以呢條長約一分鐘嘅片，都係喺戶外，以佢招牌「廚神」look現身。
謝霆鋒同印刷有乜關係？紅線係霆鋒嘅曲奇。新興主席行政總裁陳志堅話，公司兩年半前，即霆鋒首次推出其自家曲奇開始已經合作，生產包裝盒，仲話霆鋒已經係公司的策略伙伴。最後新興仲送鋒味曲奇做上市紀念品。
霆鋒一向都有沾手股市，唔知佢又有冇興趣入股新興呢？
李華華