曼聯周二歐聯喺主場迎戰賓菲加，雖然唔係踢得特別好，只靠烏龍波同12碼贏2:0，但佢哋四戰全勝12分，只係因為莫斯科中央陸軍同日作客亦擊敗巴素利，先至勒住，未能提前兩輪獲得16強資格。
摩連奴：我話事好正常
不過，呢場波發生咗球員爭射12碼小插曲，話說曼聯今場獲得兩個12碼，安東尼馬迪爾射失咗第一球，下半場仲被換走，而首席射手盧卡古，下半場再有12碼就當仁不讓，上前執起個波，點知領隊摩連奴喺場邊手指指，結果安達靴里拉搶咗盧卡古個波先，後尾又俾戴利白蘭特搶咗，最終變後者操刀奠定2:0勝局，而摩佬賽後亦解釋唔畀盧卡古射，係因為對方之前曾宴客，而且由佢決定邊個射好正常，唔明點解外界大造文章。
不過，摩佬賽前明明講到盧卡古神聖不可觸碰咁抬高愛將，家陣又唔畀佢破六場入球荒，又係咩玩法呢？