林鄭管治新風格，肯定係任篤！篤出九唔搭八80萬個公屋單位上限，夠皮啦，政府收得籌，專注跟地產商開展世紀摸底換地賺到最盡大行動。合作形式頭一砲，由以前的象徵性握手，變為被乜叔物叔親暱地摸住玉手四萬咁口任影。地產結合威權隻手遮天，市民有目共睹。唔滿意的話，林鄭叫你瞇埋眼，當睇唔到咯。
睇唔到，篤得出；林鄭愛將陳局長，又使出任篤招式，號稱高鐵五十年回報高達2700億。條數考起核數師。原來連每個月萬五蚊請人提供一萬個職位空缺都當埋回報效益。馬主席早就「大篤」過，聲稱高鐵每個月八千萬營運費，泛民唔通過一地兩檢，就等如個個月倒錢落海。八千萬，二千七億，篤篤篤個不亦樂乎。唔滿意的話，再次瞇埋眼，當高鐵耗資那九百億港元唔係錢，係廢紙。廢紙擲落海，當睇唔到咯。
習大帝明講反話，樓確係用來炒的，高鐵一地兩檢之後，樓價條底線實有衝擊。陳局長一篤到尾，預告定，西九附近商廈會被強力掃貨，資金是黑是白唔重要啦，未來五十年，瞇埋眼數錢就好。香港史的前景，金到爆。林鄭，被追封「金柒」。