周二歐聯最爆冷賽果，非C組車路士作客羅馬一戰莫屬，堂堂上季英超冠軍慘吞三蛋，錄得季內最大敗仗之餘，更拱手讓出小組榜首位置。
柏洛迪小法老另類慶祝
雖然話就話羅馬喺兩周前首循環，嚟到史丹福橋同車仔打成3:3平手，都知今季由迪法蘭斯高領軍下唔嘢少，但車仔輸到0:3都真係有啲意想不到，佢哋喺開賽37秒已經失守，俾艾沙拉維喺禁區外後上用腳背射龍門左上角破網，之後踢到36分鐘再因為後防疏忽，魯迪格同艾斯派古達接連犯錯，造就艾沙拉維梅開二度，上半場已領先兩球。
當呢位意大利前鋒射成2:0後，同成班隊友開心慶祝時，喺佢背後、嚟自阿根廷嘅29歲隊友柏洛迪就唔係做攬吓佢、拍吓佢或者握吓手之類咁普通嘅動作，竟然係加藤鷹上身，出動「神之手」故意插艾沙拉維後庭，艾沙拉維雖然當堂嚇一跳，但轉身對住柏洛迪就得啖笑。嘩，真係唔知羅馬班球員原來喜歡玩呢味嘢，但無論點都好，柏洛迪下半場就好似如有神助咁，因為下半場入波令羅馬大勝3:0嘅，正正就係嚟自呢位阿根廷人嘅廿碼冷箭。
馬體會失分益車仔
車仔輸波後俾羅馬一分反壓跌落第二，但因為同組嘅馬德里體育會喺另一場，亦爆冷同阿塞拜疆球隊卡拉巴克喺各有一位球員被逐嘅情況下賽和1:1，四戰得三分，所以手執七分嘅車仔要爭出線，仍然比較樂觀，但埋單輸三球，領隊干地點都冇可能唔嬲，賽後就話球員下半場明顯踢得仲差，令羅馬更加有信心可以贏波，而且就好失望同擔心球隊前景，尤其嚟緊聯賽就要同次席曼聯火併，要好好分析現時球隊嘅問題。
《ESPN》賽後出今場每個球員嘅評分時，就畀今場倒戈羅馬嘅魯迪格最低分嘅四分，仲話佢喺比賽中好淆底，尤其球隊失嘅第二球，佢應該孭晒成隻鑊，但門將泰拔高圖爾斯都仍然為呢班犯錯令佢失三球嘅隊友辯護，仲話下周日大戰曼聯一定會反彈喎。