巴西球星尼馬近日化身「青頭仔」，搞到大家都好想知佢喺萬聖節會有咩造型。結果佢幫PSG喺歐聯大炒安德列治5:0後，隨即喺ig上載咗自己同丹尼爾等一班朋友開P嘅相，尼馬將頭髮染青係扮緊電影《自殺特攻：超能暴隊》入面嘅Joker喎！
巴塞悶和仍保優勢
尼馬個頭確係搶鏡，但佢嘅PSG隊友古沙華亦不甘示弱，作為左閘竟然喺歐聯大演帽子戲法，認真威水喇！而同組嘅拜仁慕尼黑憑查維馬天尼斯頭槌奠勝，作客2:1擊敗些路迪，同PSG攜手出線，雖然頂爆眼角血流披面，但佢就話只要有波入，場場爆缸都願。
D組第四輪賽事就兩場比賽都和局收場，榜首嘅巴塞隆拿0:0賽和奧林比亞高斯，好彩同組嘅祖雲達斯作客士砵亭亦踢成1:1，令巴塞依然維持優勢，下場攞一分就肯定出線。