港將戴偉浚效力嘅英甲球隊貝利，周一喺官網宣佈解僱領隊李爾奇勒(小圖)同佢個助手阿倫湯臣。
貝利今季戰績奇差，各項賽事19場比賽嘅成績得4勝3和12負，當中包括最近喺英甲四連敗，亦係球隊季內暫時最長嘅連敗紀錄，跌落聯賽尾二，結果，會方決定將奇勒炒魷，傳會喺兩周內敲定新帥人選，而暫時就由球員賴恩路維身兼教練一職。貝利易帥，唔知呢個決定會唔會影響近期已經連後備都冇嘅阿浚。雖然李爾奇勒係提拔阿浚上一隊嘅恩師，但阿浚只曾三次正選上陣，另外三次就後備登場，對上一次披甲已經係9月19號，喺英錦標分組賽0:4大敗畀羅奇代爾嗰場波；至於喺英甲戰線，阿浚更已經連續12場波連後備都冇份。換領隊後，阿浚會重獲新帥重用、維持現狀抑或租借去其他球隊？拭目以待啦。