錢原來唔能夠令人特別快樂嘅！事緣有傳媒報道，尼馬今夏以破世界紀錄轉會費由巴塞隆拿轉投巴黎聖日耳門（PSG）三個月都唔夠，就已經覺得喺巴黎唔開心，好後悔離開巴塞咁話喎。
有特權辣㷫PSG隊友
報道話尼馬掛住巴塞嘅生活，掛住兩位拍檔美斯同蘇亞雷斯，上星期六佢仲特登抽時間返舊東家探班，並將好兄弟重聚嘅相上載到個人ig，同PSG班隊友就冇咁親密囉！
其實都唔難理解，早前尼馬同卡雲尼爭射12碼搞到滿城風雨，最近又傳出佢喺隊內扮大牌，享有太多特權，包括有兩個物理治療師服侍、練波可以唔使參與防守、禁止對佢作粗野攔截，結果辣㷫咗班隊友；仲有嘅係，佢係唯一練波唔使帶印有PSG會徽裝備袋嘅球員，鍾意用自己牌子嘅袋或者任何贊助商嘅袋都得。
報道又話尼馬唔太滿意PSG教練艾馬利嘅訓練方法，覺得佢浪費太多時間用影片去研究比賽同分析對手，而前一星期對馬賽咁躁領紅牌，除咗踢到火起，尼馬亦被傳話想用呢種方法話畀艾馬利聽，自己唔妥佢某啲排陣。
到底篇報道講嘅有幾多真同假，大家請自行判斷，但艾馬利聽到呢啲咁擾亂軍心嘅傳聞就即刻走出嚟澄清：「尼馬係充滿決心同動力先會嚟到巴黎，佢有野心想同球隊一齊越攀越高。」對於傳尼馬唔鍾意訓練方式，艾馬利就話：「尼馬睇片時好專注喎，成日都坐第一排，而每個球員都知道呢個環節好重要，如果我唔播片，佢哋反而主動要求我播。」
