港交所（388）交易大堂上星期五同大家講拜拜喇，嚟緊佢細佬倫敦金屬交易所（LME）個交易大堂都危危乎，面臨被拆嘅危機，因為即將試行電子系統囉。
話說LME個交易大堂點樣對盤同定價呢？咪就係每日上晝11點40分同埋下晝5點鐘，一班交易員圍埋喺個"RING"度，每種金屬有5分鐘時間，畀大家盡情地喪叫價去交易，仲要用埋指定手勢去確認買賣指示，用紙筆去記低，如果用手機仲會俾人罰錢㖭。
LME行政總裁Matthew Chamberlain話下年試行電子化後，可以測試到交易大堂本身個叫價模式競爭力有幾大喎。查實好多人都明白，呢個有超過100年歷史嘅叫價模式係好睇唔好用，喺數碼化嘅年代，睇嚟都好快同大家講拜拜。
李華華