【本報訊】香港眾志秘書長黃之鋒，上周與羅冠聰獲准保釋等候上訴，難得重新呼吸自由空氣。之鋒昨接受《蘋果》專訪時說：「坐監期間，我一直同自己講：冇嘢好怨，行呢條路係我主動嘅選擇，我知我可以坐完監就隱退，去外國讀書，但我絕對唔會。」在一眾年輕政治犯中，之鋒的刑期最短，卻獲國際最多關注，他為此內疚和自責，甚至「覺得不配」。民主路漫漫，他承諾會以倖存者心態，續未竟之路。
記者：呂麗嬋
「可以參與呢場香港歷史上極之關鍵嘅運動，我只係覺得幸運」。說話如機關槍，之鋒入獄前試過一日趕10個訪問。剛滿21歲的他自覺要放慢腳步，入獄後瘦了一圈，正爭取時間與父母吃飯、與戰友開會，更忙着看回入獄期間的剪報，「睇番好多新界東北案家屬嘅訪問，深深覺得身邊人仲辛苦過坐監嗰個」。入獄讓他沉澱思考，儘管一直被捧上天，他卻表現清醒。
慶幸開明父母支持
「我只係剛好企咗喺國際社會關注嘅位置，其實喺13+3+N入面，我嘅服刑年期係最短，我一直覺得，自己唔配有咁多國際社會關注，但如果我企緊喺幫到公共領域同民主嘅位置，我一定會繼續做。」生於中產家庭，父母都是知識分子，讀私立小學、直資中學，他說同級三分一同學到外國升學，單去英國，至少也有十個，「喺高院重遇個舊同學，佢讀法律喺法庭幫手做實習，臨坐監前兩小時撞番」。
命運迥異，但黃之鋒慶幸有開明的父母。他在獄中看到媽媽親筆寫給特首林鄭月娥的信，力發千鈞。之鋒心裏讚嘆媽媽「果然係中文系學生」，亦回想過去幾年走過的路：「會諗如果冇國教、冇雨傘運動，跟循我父母嘅軌迹，我可能都會去外國讀書，做個好典型所謂獅子山下精神嘅學生」。
「我可以好老土咁話係時代嘅呼喚，但我更加慶幸當初選擇留喺香港，參與歷史」。一走了之容易，留下來更難。回到反國教時空，他佔領公民廣場十日，無申請不反對通知書，畢竟當年以「坐監」起跳的高壓氣氛未成氣候，「你可以講拉咪拉，但唔到坐監前一刻，係唔會感受到嗰種壓力」。近年參與社運的代價越來越大，「根據今日嘅社會氣氛，我有三分二機會會再入獄……唔介意坐3個月監，但3年監又如何？」
樂見眾志戰友成長
從14歲創立學民思潮、反國教一戰成名、登上時代雜誌封面、再被判入獄，走過高山低谷，這個總是被指「寸嘴」的少年早有心理準備再入獄服刑，「被判坐監前一日我問自己一個問題，當日同樣衝向公民廣場有200人，其餘嗰197個人𠵱家做緊咩？曾經喺呢條路一齊行嘅人會如何回應？好彩坐監嘅呢兩個月，大家冇令我失望」。
之鋒喜見小別69天的眾志戰友成長，主動開發議題及連結國際，「坐監前會擔心，怕眾志會散，出嚟先發現冇咁依賴主導會議嗰3個人，更願意主動提出諗法、付出更多」。