【本報訊】監獄無啖好食，但不說不知，原來2000年以前，獄中並無奶茶咖啡供應，多得曾為階下囚的立法會議員詹培忠出獄後向當局爭取，囚犯方每周獲准享用一杯奶茶。
不過，黃之鋒自言這杯獄中福利奶茶，其實味道麻麻，在監牢閒着無聊又口淡淡，特別懷念家中的「媽媽奶茶」，「最開心係出嚟後，阿媽已進化到喺屋企煲絲襪奶茶，所以特別好飲，比起之前用茶包沖又進一級」。
監獄命令壓抑獨立思考
港大中文系畢業的黃媽媽，連港式奶茶都識沖，更進一步調製絲襪奶茶迎接兒子出獄。自上周回家至今，之鋒差不多每日嘆一杯媽媽奶茶。
之鋒說，在獄中服刑，本質上到底是坐監，要學習適應環境。他形容監獄奶茶雖然「衰過粉溝」，「以前飲奶茶，從來不屑沖三合一」，但物以罕為貴，監獄有都「一定照飲」，沒有揀擇的權利。
監獄講究服從命令，在之鋒眼中，統統是壓抑獨立思考的規條。「摺氈摺到正方形起角，啲懲教職員同啲囚友講，做到會有成功感」。
這一套「獄中學識服從紀律，在社會就可以服從法律」的理念，他深表質疑：「如果價值觀冇改變，出到去又同社會脫節，摺到張氈幾靚又如何？」但弔詭的是，黃爸爸早前在受訪時就表示這個寶貝仔自理能力麻麻，在家不摺被，衣服鞋襪隨處掉。
不過，之鋒亦不改牙尖嘴利的本色，毫不客氣地反駁爸爸的意見，「呢啲係觀點與角度箒，其實我都唔見佢有摺被喎」。出獄之後曾經自言坐到思路都慢了的他，看來已經回復狀態。
■記者呂麗嬋