立法會議員鄭松泰上個月啱啱先完咗佢倒插國旗嘅審訊，罪成罰咗5,000蚊，梁美芬隨即帶領調查委員會調查泰博係咪行為不檢同違法誓詞，結果就仲未有，但前日又有新西選民入禀高院，話泰博舊年宣誓嗰陣讀出「全民制憲」、「重新立約」等口號違反人大釋法，要求法庭聲明立法會唔可以再出糧畀佢，仲要追番之前啲人工。
幫助呢位選民鄭慧琪（譯音）入稟嘅律師蕭思江，10年前參選過港島區立法會補選，佢當年自創「飯碗必勝舞」拉票令人印象難忘，佢做主席嘅港人民權民生黨，早前亦入稟話游蕙禎宣誓時侮辱中國人，質疑平機會拒按《種族歧視條例》調查嘅決定不當。其實原告就冇話要DQ泰博嘅，淨係話唔可以出糧畀佢。記者噚日諗住問吓泰博冇糧出仲做唔做議員，但佢就冇聽電話。