中共十九大後，香港有訪京團出發嘞，唔知到埗後會唔會收到新聖旨？由馬恩國大狀擔任執委會主席嘅中澳法學交流基金會，20人團將會喺周三出發訪京4日，行程相當緊密，除咗拜訪全國人大香港基本法委員會、港澳辦、最高人民法院同全國港澳研究會等，回程當日更會參觀中國人民革命軍事博物館，唔通為咗喺香港打港獨硬仗取經，皆因馬大狀引述過京官話，對付港獨「要槍有槍，要炮有炮」嘛！
雖然去年同一訪京團爆出夜蒲事件惹來爭議，但身為中聯辦法律部部長嘅王振民，今年再以榮譽顧問身份隨團，退出咗基金會嘅譚惠珠就冇喺團員名單。
基金會話此行係傾十九大國家方針同香港嘅關係，以及香港現時嘅法律問題，適逢人大常委會噚日起至周六開例會，其中一項議程包括將國歌法納入《基本法》附件三，唔知馬恩國有冇練定兩嘴，親自示範何謂莊嚴獻唱國歌？