每逢澳門政府派錢時，唔少港人恨到流口水，但澳門出世嘅衞生服務界議員李國麟（Joseph）就冇貪過呢啲小便宜。澳門鏡湖醫院呱呱墮地嘅Joseph，6、7歲隨家人由澳門移民香港，自此一直住喺西灣河太安樓。媽媽來港後工作冇變，繼續做戲院售票員，爸爸就由經營酒店變成喺深水埗開毛衣廠。
雖然事隔幾十年，但當年喺澳門讀培正小學嘅Joseph仍然難忘喺俗稱「盧九花園」、即係盧廉若公園嘅快樂時光，佢話當年小學位於園內，所以每日返學即係去公園玩。
澳門出世但無身份證
Joseph其後升讀筲箕灣官立中學讀到中五，試過去工業學院讀報造船，可惜因為開班不成去咗學打電報，喺當年好出名嘅英國大東電報局打工，連摩斯密碼都識。但做做吓嫌悶，改咗去學校做實驗室技術員，之後知道做護士可以住宿舍，1980年起就入行做護士，做做吓就做埋護協主席，早年仲留長髮，2004年起連續4屆當選衞生服務界議員。
近年澳門經常拒絕泛民議員入境，咪以為Joseph有免死金牌，因為佢一直冇申請澳門身份證，所以唔肯定入唔入到境，亦從未攞過澳門政府派嘅錢。今年58歲嘅佢話兩年後喺公開大學教職退休，亦有意喺立法會退下火線，希望交棒畀年輕人，相信到時可以拉番從政後放低嘅二胡。