【本報訊】2014年雨傘運動，讓羅冠聰與黃之鋒命運交叠，成為戰友。由政治素人到成為學聯秘書長、由最年輕立法會議員到被DQ議員身份，甚至入獄，過去兩年如坐過山車似的人生，羅冠聰直言自升大學以來，在大時代中被拉扯面對不同變化，現正整理兩個多月以來在獄中撰寫的手稿及書信，希望結集成書。他又謂暫獲自由變得黐家，抱歉讓媽媽擔心，只希望爭取時間多陪家人及女友，珍惜相處時光。
盼將獄中手稿結集成書
相約羅冠聰受訪，剛自台灣工作回港的女友袁嘉蔚，一直陪伴左右。「我得閒就做住佢助手先，佢寫嘅嘢都有畀我睇，叫我幫手做吓校對」。總在身邊默默支持的小妮子說。對於牢獄生涯，羅冠聰形容是不幸，但也有意外收穫。「喺獄中冇手機電腦，只能夠看書寫作，我整理咗對學運社運諗法，相信呢啲對香港人亦有意義，也讓關心我嘅人，知道過去幾年我嘅生活」，望把獄中撰寫的手稿及書信結集成書，回顧過去，反思前路。
都說年輕人要作生涯規劃，24歲已走過高山低谷的他直言好難。「過去幾年嘅狀態係：你永遠唔知幾個月後嘅自己會做乜，唔係冇計劃，係被外界拉扯得緊要，起起伏伏，每隔幾個月就有大嘅變動」。對於媽媽，他自覺有虧欠，等候上訴期間，難得重新呼吸自由空氣，他亦希望以家人優先。「佢係典型強勢媽咪，但我知佢好擔心」。盡在不言中的一份母子情，好深厚。
出身基層單親家庭，面對現實問題，羅謂媽媽亦會「呻一兩句」，但更多卻是支持。為社運、為理想付上代價，他自言也非絕對的壞事。「你感覺到自己成長咗，可以承擔更多壓力，亦接受要付出更大嘅代價」。他表示：「囚友同我講：『出咗去就唔好返嚟』，心底知道佢哋都係為我好，但現實係決定權不在我而在政府，如果呢個政府真係尊重民意，好多人根本唔會需要坐監」。有心理準備或需再服刑的他說。
■記者呂麗嬋