由前南華隊長李海強任教練嘅梅縣鐵漢，上星期六喺中乙升班附加賽次回合，作客深圳人人就贏1:0，兩回合計贏3:1，攞到下季中甲升班資格，而球會高層季前講好咗，升班就有2,000萬元人民幣（人仔）做獎金，正所謂「牙齒當金使」，拎咗升班資格，老細同贊助商賽後即刻分兩架手推車推咗2,000萬人仔（約2,300萬港元）入更衣室分畀球員，盡顯土豪本色。
強哥執教 每人分60萬
國內球季已到尾聲，首回合主場領先2:1嘅中乙梅縣鐵漢，喺上周六次回合作客深圳小勝一粒，兩回合計贏3:1，實現季前升中甲嘅目標，教練李海強賽後仲俾球員拋起慶祝，現場紅衫球迷梗係忘形慶祝。
不過，梅縣升班嘅慶功好戲喺後頭，鐵漢班主季前講咗，升班就有兩千萬做獎金，而班主同贊助商見球隊升班附加賽領先，預先準備兩箱總值2,000萬人仔現金推入更衣室，球員賽後返到更衣室見到堆獎金，高興到不得了，就算話咗唔好對外講即場分現金獎金，啲球員又點忍得住唔同啲獎金影合照，結果相同片就曝光囉。
據聞，2,000萬人仔其實係冇即場分晒，球員分咗部份，淨番嘅要等球會處理，至於每位職球員分到幾多仲要等球會計數；保守計，球隊大概有30人，每人平均可以有60萬人仔，仲要係現金，認真過癮兼和味。
下月同黑龍江爭總冠軍
不過，梅縣鐵漢呢個土豪本色升中甲嘅故仔，其實仲未完，因為中乙仲有場總決賽，由中乙南部聯賽冠軍梅縣鐵漢對北方冠軍黑龍江，兩隊喺下個月初爭中乙總冠軍，不過，最後邊隊輸贏都唔會影響球隊嘅升班資格。
李海強喺東方結束球員生涯，就返咗國內球壇發展，曾喺中甲嘅深圳恒宇做過副總經理，之後轉咗去家鄉做中乙梅縣總教練，就即刻帶隊升班。除咗強哥，教過黃大仙嘅潘文俊上季就北上梅縣做助教；佢哋就話，下季上到中甲，玩法同冇外援嘅中乙完全唔同，班費亦多好多，所以呢刻都係集中精神踢好場中乙冠軍戰先，之後再同班主傾組軍方針。
知多啲：恒大派錢先最誇
中國球壇近年雖然土豪浪接浪，財力最強始終也是許家印旗下的廣州恒大，上月恒大在亞冠盃八強首回合0:4落後給上海上港，許老闆懸賞共3,500萬人民幣（約4,200萬港元）絕地反擊獎金，只可惜恒大奇蹟追平後（加時後合計和9:9）互射12碼落敗，不過據報許老闆滿意表現因此照派1,000萬人仔作獎勵。