劉慧卿噚日嘅網台節目訪問自由黨榮譽主席田北俊，直播前田少就話田毛毛教佢fb直播唔好多過3分鐘，否則冇人睇，當得知卿姐節目長達半粒鐘後，田少即時急call田毛毛幫拖，攞住電話講：「我𠵱家喺劉慧卿個節目，如果你方便幫我分享埋佢」，田少笑言網民現時若睇直播，「係睇都睇黃之鋒啦，點會睇我同你？」卿姐就話唔好妄自菲薄。
田少開咪前問卿姐講乜話題？卿姐就話「爆肚囉」，田少搞鬼指：「唔好同我談情說愛呀！」卿姐笑住答「問下Mary（田太）先吓」，又叫田少見到佢唔使驚，田少靚抽：「我見689都唔標汗，見你點會標汗？」
雖然卿姐嘅網台節目中不時炮轟林鄭月娥，但佢透露林鄭早前答應出席佢網台接受訪問，目前正夾緊時間，睇吓11月有邊日得閒受訪！