今天（30日）晨課除咗氣溫涼咗啲，啲騎練大部分都換晒冬天衫之外，就連「巴基之星」都冇扭計，按騎馬人指示乖乖哋去大圈操馬，似乎呢日好似冇乜特別咁，如果咁諗，就真係你以為啦！
事關呢朝早，蘇保羅馬房「得德仔」由副練策去大圈快跳嘅時候，被發現馬頭上面突然多咗一舊hi-tech嘢，隔離仲有位外籍男士響度搞嚟搞去，兼手持一件類似遙控器嘅東西。
唔通呢個就係蘇保羅嘅最新練馬工具，當然要向馬會詢問，問個水落石出！
原來呢位外籍男士係馬會獸醫，而「得德仔」頭嘅hi-tech嘢，就係馬會近年嘅新科技，係一個可移動嘅氣管內窺鏡，等獸醫於「得德仔」操練時，透過佢手上之黃色監測儀器，實時睇到匹馬嘅氣管，有冇內出血、起痰等等情況。
馬迷可能會問點解只有「得德仔」先要用，事關呢匹馬一年前接受過喉部接受手術，雖然之後都能作賽，但就未贏過。或者練馬師就此等意安排有關措施，睇吓「得德仔」條氣管有冇問題，以便從長計議。