皇家馬德里星期日作客畀升班馬基羅納爆冷以2:1擊敗，除咗痛失3分之外，王牌球星基斯坦奴朗拿度（C朗）更加因為喺比賽中推對手個頭而可能有手尾，有機會被追罰停賽。
啱啱先贏完國際足協年度最佳球員冇耐嘅C朗，畀鏡頭影到佢喺比賽中同基羅納球員皮利龐斯糾纏嘅時候，一手推咗落對方頭頂，跟住再推落佢塊面，之後皮利龐斯就跌咗落地。英國傳媒認為，C朗呢個動作有可能會被追罰停賽。
C朗8月喺皇馬贏巴塞隆拿嘅西班牙超級盃首回合兩黃一紅被逐後，因為不滿而推球證被追罰，總共停賽五場，錯過咗西超盃次回合同今季頭四場西甲聯賽，如果今次佢再停賽，對喺聯榜排第三、落後榜首巴塞8分嘅皇馬肯定係壞消息。