影相仲po「手指心心」？識擺梗係擺「收藏手勢」！雖則將來統領青年發展委員嘅係現年66歲嘅政務司司長張建宗，但唔等於佢唔識得跟上潮流大勢！
政府為青年委員自薦試行計劃拍咗個廣告，向18至35歲嘅年輕人招手，歡迎佢哋自薦加入委員會，張建宗為此粉墨登場，聯同青年事務委員會主席劉鳴煒拍短片表明「等你埋位」，指政府願意聆聽年輕人意見。
拍住Package男神，張建宗點可以被比下去？難怪片中嘅佢七情上面，仲擺出近期hit爆韓國男團Wanna One嘅「收藏」手勢，男團係咁樣向粉絲示愛㗎，主角換上張建宗，係咪更冧？劉鳴煒則喺fb上載短片兼留言「Hi建宗Oppa」，又形容為「政界男團」，hashtag包括「處男下海」、「勇氣可嘉」，唔知係講佢自己定張建宗？