習近平、李克強留任為中央委員，其他五名中常委退休，係意料中事，淨係講年齡一項，習李兩位再做五年都未夠70歲，唔似得王岐山今年已滿69歲，按鄧小平當初定下嘅習慣，國家級領導一般不超過70歲，王岐山退下，合乎習慣，至於其他四位：俞正聲、張德江、張高麗、劉雲山均已70歲或以上，更無理由留低。
新任常委自不然以習（64歲）李（62歲）為首，其他五人有希望成為習近平接班人嘅，會係栗戰書（67歲）、韓正（63歲）、趙樂際（60歲）、王滬寧（62歲）、汪洋（62歲）。到咗20大，栗戰書已經太老，汪洋韓正年近退休，王滬寧係共產主義思想理論家，缺乏中央及地方省委書記行政經驗，而李克強五年後亦67歲，所以純論年齡，最似樣嘅接班人係趙樂際，身兼中央委員兼中紀委書記，如未來五年立下功績，似係接班人嘞，本來廣東省委書記胡春華（54歲），新任重慶市委書記陳敏爾（57歲）盛傳有希望，年齡亦最合適，但胡春華係胡錦濤派，出身共青團，習近平近年用人，冇乜團派有運行嘅噃，至於陳敏爾，七月先至臨危受命去重慶收拾孫政才遺下嘅爛攤子，重慶書記係三煞位，前兩任都不得善終，陳敏爾要受考驗下先至可以講有無希望再升。
初步睇法係，習近平已集大權於一身，信奉威權主義，對外要宣揚中國崛起成為世界第二大強國，對內宣傳中共不貪腐……廉潔有為，以爭取人民滿意度，一個聲稱人民當家作主而實際上由一黨把持嘅威權政府總不能製造民憤也。趙樂際負責打貪，穩定內政，外政呢？似乎冇乜邊個有經驗噃，假如五年後真係由趙樂際接班，外交事務會係一個大弱點，隱隱約約構成習近平不可或缺之藉口，習主席大可做夠十五年，74歲後成為另一位鄧小平。
經常往返北京嘅業餘中國觀察家Y先生積40年北京收風經驗，同左丁山在Cova飲茶時講到習近平似乎係集權一身，無人可用。不少觀察家以為習大大重用佢在福建、浙江、上海嘅舊部，究其實，佢只在三地各自當政幾年，說不上有深層關係，完全沒有出生入死的同志兄弟，故此不會輕易相信他人。Y先生話：「毛澤東與朱德、彭德懷、林彪等飽經憂患，共吃苦頭打天下，最後仍然不能共富貴。北京朋友故此相信：習主席身邊冇邊位係死忠人物咯，夠膽唔聽佢話嘅領導，隨時會雙開！」