今日係萬聖節，但由於係星期二，唔少藝人都提早慶祝。要諗咩造型先可以突出，真係要花啲心思，好似洗米華嘅緋聞女友松岡李那，今年就扮咗一隻性感貓女郎，黑色緊身衣完全可以突出佢玲瓏浮凸嘅身段，而胸前嘅大Deep V夾出「X」字胸，真係搶晒fo。
而媽咪級嘅鍾麗緹、楊千嬅、周汶錡都玩埋一份，鍾麗緹扮蜘蛛女，仲用手機apps惡搞咗個殭屍妝。而楊千嬅就扮神奇女俠，話要瘋狂玩番晚，佢囝囝Torres就戴咗隻魔鬼角，但只得背面相。而扮神奇女神嘅唔止得千嬅，仲有翁靜晶大女劉萬儀，佢嘅造型比千嬅性感啲啲，着low cut，仲揮武住把劍，hashtag洪拳，有住爸爸劉家良嘅威猛影子。
至於周汶錡就冇出場，派咗兩個可愛仔仔Jacques同Avner扮鬼扮馬，由於佢哋都好白淨，唔化妝着起吸血殭屍裝，都似模似樣。