周日西甲皇家馬德里作客出戰升班馬基羅納，由於場波喺加泰羅尼亞地區進行，更加備受關注。結果場波冇風冇浪平安完成，但賽果就嚇親人。皇馬喺半場領先一球情況下最後竟然反輸1:2，爆出12倍冷W同埋70倍「半全場」[客/主]，新鮮出爐世界足球先生基斯坦奴朗拿度（C朗）又冇波入，認真冇癮。
皇馬反負升班馬
皇馬喺上半場由艾斯高建功先開紀錄，但易邊後形勢逆轉，基羅納喺54同58分鐘各入一球，反勝2:1，令皇馬喺27年以嚟，首次喺球季首遇升班馬就輸波。喺上周一大熱獲選為2017年度國際足協最佳球員嘅C朗繼續沉，今場冇波入，經過10輪聯賽只係入一球真係歷年最差，而佢更加因為喺比賽中拍對手個頭而可能有手尾，有機會被追罰停賽。
皇馬輸波，𠵱家10場得20分落後榜首巴塞隆拿八分。從過往數據睇，皇馬過往當落後榜首球隊至少八分嘅情況下，從來未曾可以最後後上封王，不過教練施丹就依然淡定︰「其他球隊亦會失分，我哋希望贏到西甲，球季仍然好漫長，所以我並唔擔心。」
