枕邊人喺辦公室多過喺屋企、日日做嘢做到三更夜半，第一先生林兆波周末要一個人過，都唔係好奇怪箒！
有讀者向八方報料，話前日喺香港電影資料館電影院撞到好面善嘅一男子，恤衫西裝褸波鞋衣着樸素，原來係林鄭月娥另一半林兆波。佢買咗4點半嘅飛睇黑澤明嘅《我對青春無悔》，呢套係黑澤明1946年執導、戰後嘅首部電影作品，故事講學生爭取言論同學術自由，但俾政府鎮壓，被認定係反戰之作。
林兆波原本坐喺第一行最左邊個位，及後有一家三口嚟到，疑似父子坐喺林兆波旁邊、相信係媽媽嘅女士就一個人坐喺同行最右手邊，林兆波繼而同旁邊男子耳語，然後同女士調位，估計係主動讓位畀一家三口坐埋一齊。散場後林兆波邊㩒電話邊走人，繼續孤身走佢路。