同朋友開餐，除咗食好西仲想食氣氛？北角渣華道熟食中心東寶小館肯定上榜，去過朋友嘅朋友都樂而忘返，皆因嗰度會播歌，似搞埋嘉年華。
公民黨立法會議員陳淑莊係東寶鐵粉，經常喺嗰度打躉，上周五佢同朋友又去捧場，咁啱公民黨黨魁楊岳橋就喺另一枱。據知當晚另有一位歌星在場，令現場氣氛高漲，Tanya同AY一聽到《無心睡眠》就情不自禁自動埋位合跳，「WHOO-OH-O無心睡眠，WHOO-OH-O腦交戰」，哥哥嘅經典舞姿重現，兩人舞姿好合拍，帶領全場high爆。Tanya喺facebook上載跳舞短片後，立即喺網絡瘋傳，可能因為跳得有默契，有人質疑早有演出預謀，當晚踩住3吋半高踭鞋嘅Tanya話純粹即興，「完全冇排過，雖然好齊，哈哈哈！」