新民黨立法會議員容海恩向來喜歡唱歌，不時喺facebook上載鵝公喉式高歌短片，半個月前就喺fb放過喺北區打鼓嶺一個戶外鄉事活動上台唱歌嘅短片，形容影片係「周六驚喜」，仲話「研究吓把聲係咪咁沉咁鵝公先」，佢唱嘅歌係北美歌手Paul Anka上世紀五十年代末嘅名曲《Diana》，估唔到事隔半個月引起歌手何韻詩注意，前晚睇片後形容係大妗姐式唱腔，笑言對方「無私」，「為眾生提供快樂」。
勾起唱小丸子回憶
其實當日上載短片後，唔少網民都彈難聽，容EE卻不以為然，3日後回應「唱成點不重要」，咁又係，條片喺fb流傳半個月，累積逾11萬人次睇過，包括前晚睇片嘅何韻詩。何CC之後仲喺fb轉載兼有感而發：「佢呢個唱腔，令我頓然想起當年得知被分派唱兒歌《小X（丸）子的心事》，發住爛渣咁錄嘅情景」，又hashtag形容對方係大妗姐式唱腔，笑言「氣魄嘅嘢、自信嘅嘢、自GG明（自知之明）嘅嘢，唔恨得咁多」。
雖然俾何CC諷刺，但容EE一啲都唔介意，喺何CC發帖兩個鐘後留言「反擊」，配上招牌儍大姐式笑臉嘅表情符號回應「梗係無你唱得咁好啦」。八方噚日都有就此問過容EE，佢繼續一貫笑看風雲，話歡迎何CC親自示範，指教歌曲原key，唔知呢個世紀對唱場面，會唔會終有一日上演？
李八方