明星級新股閱文（772）引爆全城搶孖展熱潮，唔少證券行第一日招股已經借爆額，但如果係耀才（1428）員工嘅話，就唔使咁辛苦周圍撲水，皆因諗頭多多嘅主席葉茂林又有橋，向每位員工提供100%孖展抽2萬股，即每人110萬銀（閱文每股上限價55元），講明「贏就員工，輸就歸我」，即係大家可以坐定定等收錢！
耀才話，閱文第一日招股已經有400個新開戶，一班員工為應付而忙唔停，葉茂林為咗感謝全體超過300位員工而提出優待，向每位員工免按金借出超過百萬認購閱文新股，涉資超過3億銀。
據講，耀才員工只要簽低個名就自動享有優惠，唔使按金只畀孖展息，假如抽中而閱文首日潛水，賬面損失就歸老闆，有賺就落袋。
查實對耀才員工來講，免按金孖展固然好，最好其實係唔使頭痕，因為好多散戶𠵱家仲計緊數，點樣分兩注錢、抽齊閱文同雷蛇兩大焦點新股嘅時候，佢哋老闆借錢畀佢哋抽閱文，佢哋就可以全部彈藥押注落雷蛇喇，認真羨慕死人。