明德醫院舉行嘅抬轎比賽噚日朝早喺山頂舉行，一如以往唔少企業、團體同學校組隊參賽。今年比賽主題係「跨越世代，起跑！」，唔少賽隊都別出心裁以多國傳統文化意念裝飾頂轎，例如有中式新郎新娘、亦有電影《加勒比海盜》同日本動畫《魔女宅急便》嘅角色等。
抬轎比賽規定隊伍要由4至8名跑手組成，沿山頂長2.1公里嘅路線競賽，主要為本地規模較小嘅慈善團體籌款。今年除咗新增「輕量級挑戰賽」，只需要4至6名跑手抬轎兼不設乘客，更新增全港首次舉辦嘅親子迷你抬轎障礙賽，參加嘅家庭可以由2至4名家庭成員同朋友組成，當中要包括一個5至12歲小朋友同一位18歲或以上嘅隊長，每隊都要抬起以公仔為乘客嘅迷你轎並完成障礙賽道，希望合家歡寓玩樂兼行善。