噚日快活谷馬場好熱鬧，連現年89歲嘅香港首富李嘉誠呢位稀客都突然現身，仲帶埋孫女到場，成為各方焦點。
超人咸豐年前做過馬主，喺香港養過「信心」、「金榜題名」、「三甲」等駒；但自三甲1983年最後一次出賽後，誠哥30幾年嚟冇再養馬，近10幾20年更幾乎絕迹馬場。噚日誠哥都冇喺場內周圍走，只係喺廂房食飯睇馬，表現低調，原來佢係畀面朋友撐場，因為第5場上演香港鄉村俱樂部挑戰盃，名人何世柱、商舖業老手兼馬會遴選會員任永賢邀請超人呢位老朋友吹水兼睇馬，超人不但畀面出席，仲帶埋孫女（長子李澤鉅囡囡）到場同一眾世叔伯見面兼大合照留念。
李澤鉅同太太王儷橋育有三女一子，子女向來甚少曝光。次女同三女都未成年，而快活谷馬場喺賽日唔准18歲以下人士進入，所以超人帶住出場嘅應該係年約21歲嘅澤鉅長女李燕寧，佢亭亭玉立兼同媽媽王儷橋有幾分相似，深得爺爺疼錫。