吃過午飯，周圍行，行至歷山大廈COVA，已是下午茶時間，竟然見到幾位熟人各據一桌，輪流打招呼，再轉灣行經星巴克，碰到一位老闆，俾佢拉住，坐低飲杯檸檬茶。老闆話：「最新消息係中央政治局常務委員只係習近平、李克強留低，其他全部退休。你點睇？」左丁山又唔係中國觀察家，點識咁多呀，問林和立、劉銳紹啦。老闆話唔識佢兩位，問吓左丁山意見就算。左丁山話不如向美國商界學習，由公司或商會夾錢搵一位中國專家主持一個分析會議，講述後19大中國局勢，譬如講夠三小時，咪有益有建設性囉！
不過香港老闆唔興付鈔請專家作專題分析嘅，只想食餐飯、飲杯茶，聽吓意見就算，認真慳水慳力。不過如西方有一句說話：If you pay peanuts, you get monkeys，但香港就是有好多老闆唔鍾意聽呢一句。
二十幾年前，台灣媒體/文化界名人高信疆先生到港，在明報工作，有一次見到佢，高先生話：「左丁山，你有冇一千萬一年呀？」嘩，左丁山嚇咗一跳，問佢點解咁睇得起？高先生話：「我在台灣到電視台做時事、文化節目評論，到大公司演講，到書店講書評，有時出席酒會應邀發言，次次有酬金㗎，你在香港識咁多人，電台、電視、報紙、論壇都見到你，你照計收入好豐富喎？」左丁山知佢初來埗到，連忙向佢解釋，香港有好多嘢係無糧工作，一講到收錢，就冇乜人睬你，去電視台出演，分分鐘連的士費都蝕埋。高先生話：「香港是落後了，現在中國大陸也學了台灣的一套！」眨吓眼二十幾年，高先生已作古，佢呢番說話講出來亦無妨。來自台灣的郎咸平教授在中大出名之後，索性辭工，專心到大陸出席不同討論會、演講、出鏡，成為財經專家、紅人，收入豐厚，早前便有報紙報導佢以幾千萬元買入尖沙嘴河內道「名鑄」豪宅。現在香港只有一啲美資大行有呢個作風，以前中大校長劉遵義教授應邀到一啲華爾街大行吃午飯，順便發表意見，每次都有錢收，劉教授就將呢啲「飯局收入」捐俾中大做獎助學金。聽講現在有一位退休教授深明此道，請佢出場現身，有不同fee schedule適合不同場合，明碼實價，以免俾人抽水。呢樣作風，或者會慢慢傳開去，不過有咗互聯網平台之後，已產生一個新品種叫做KOL，新人類話俾左丁山知，KOL亦可收入豐富，唔使打工，如左丁山呢啲石器時代人物，就快被淘汰了！