林鄭慷庫房之慨，鬥氣唔行死對頭鬍鬚曾的保守理財路，但所謂的大灑金錢，益到基層嗎？八十萬戶公屋已經夠晒招呼基層班窮鬼需要，講得再老實不過了，其他比窮鬼好一些的，灑下來的錢，無你份喎一樣。還是配合「重燃置業希望」，盡早入市，幫那些扶着特首玉手當是自己媳婦、切蛋糕做騷大合照的地產霸權，推高業績，助地產商的富柒代繼續做億萬富翁吧！年輕人，遺憾做死一世樓奴嗎？林鄭例牌笑住答：我睇唔到乜嘢奴喎，唔想供樓，咪斷供咯，唔喜歡那個地產商，無買咯，就等於我完全唔知有那個睇李飛直播基本法研討會的安排，但假如唔想睇，中學生咪瞇埋眼咯。
無眼屎唔能夠乾淨盲的今日，林鄭唔知、唔睇到、唔認為、唔同意、唔代表，五唔，未來日子，會增至柒唔……甚至N唔！市民明白，唔做公眾諮詢的西九故宮和一地兩檢，唔，原來港澳辦已經拍好晒板，林鄭堆滿笑容唔唔唔搗蒜般點頭，以市長的底氣痛斥非建制派議員，黑面倒數三步走，割地去馬。
這時讀到雲南騰衝市種出巨型蘑菇的新聞，蘑菇只養到七天，因為太多人參觀，爭相擲錢祈福，終而萎爛。雲南菇萎，香港也會爛在狼娥掌中。