【即煲即介】注意!!以下內容含有劇透!!
↓
↓
↓
↓
↓
↓
↓
逃生門
↓
↓
↓
↓
↓
↓
↓
Netfilx大熱美劇《怪奇物語》（Stranger Things）擺明係要向80年代致敬，第二季開播Netfilx又係一次過公開9集滿足劇迷，今次當然繼續由一班細路仔擔正，除咗大家最愛嘅Eleven之外，今次仲加入幾個全新角色令劇集更加豐富及緊湊。
Will今次被異種支配肉體，飾演阿媽嘅雲露娜維達（Winona Ryder）繼續為仔陷入崩潰狀態，幸好呢季多咗個另一半，起用電影《魔戒》（The Lord of the Rings）系列男星辛艾斯甸（Sean Astin）扮演雲露娜男友Bob，而Bob呢個角色喺劇中最後都起咗唔少作用，事關佢於第8集更要壯烈犧牲，絕對係個不可多得嘅討好要角。至於痛失男友嘅雲露娜繼續孤身走我路，究竟佢下季情歸何處？其實第二季尾聲已有所交代，佢同David Harbour飾演嘅警長關係將再進一步。
講到今季另一搶鏡新角，當然係Mike率領小朋友聯盟中嘅金髮妹妹新成員Max，故事交代Sadie Sink飾演嘅Max同黑仔Lucas發展成兩小無猜，大結局於舞會上仲人細鬼大邊跳舞邊啜嘴。而Max同哥哥Billy嘅惡劣關係都係一條分線。Billy由電影《Power Rangers：戰龍覺醒》（Power Rangers）主角Dacre Montgomery飾演，佢為劇中80年代駁長髮演出，角色對家庭好多不滿，不過竟交代佢同Mike媽咪有互flirt情節，最後一集交代到Billy上門到Mike屋企搵妹，點知由本來正在出浴嘅Mike媽真空應門，兩人眉來眼去，當Billy離開時，Mike媽咬唇顯得春心蕩漾，暗藏發展婚外母子戀嘅伏線。
NowTV 535 Netflix頻道有得睇。