昨日講及科企太大，必有黨委。日前國資委主任肖亞慶已講到明上市國企設黨委，股東利益更受保護，無論我地是否同意呢一點，中國共產黨（中共）係一黨專政之下嘅唯一一個黨，中國所有事由中共話事，黨員必須遵從，「當家作主」嘅人民，亦不得妄議中央，否則下場會同維權律師一樣，嚴重啲更會變成另一位劉曉波。中共代表人民，故此中共代表埋股東，黨的利益就是股東利益，如果唔明白，肖亞慶會當你冥頑不靈，要改造思想。
美國讀完MBA，考完CFA嘅世姪基金經理就係呢類笨蛋嘞。呢位世姪C係要同左丁山拗：「黨的利益與股東利益未必相同、相等及一致嘅噃，國際上之最佳公司管治守則係要有獨立非執董嘅數目多過公司執董，目標就係要防止公司執董為家族或為公司高層僱員利用公司為自己謀私利，不向大眾股東交代。上市國企已有公司最高權力機構，即董事會話事，如要設置一個黨委書記嚟牢牢掌握話事權，咁樣董事長及CEO咪形同虛設？而且書記要以黨的利益為第一優先，黨的決議就是國家要推行的政策，譬如去中亞細亞一帶嘅國家投資，明知回本期好長，分分鐘蝕本，股東會反對投資，董事會獨立非執董會反對投資，但黨委書記接到命令要公司服從黨國宏觀政治利益，一定要落實投資嘅話，董事局點樣討論、通過投資議案？好明顯係踐踏股東利益啦！」
世姪C啲西方思維，要不得呀！黨永遠是對的，直至領導倒台為止，下級一定要服從上級，黨話利益與股東利益一致，你咪去信任黨委囉，講多無謂，國企無論上市與否，根本就係為黨國服務嘅，不是為股東服務（上市之後嘅股東），國企好多時享有壟斷性，卡台爾式分餅仔嘅利益，內地市場嚴限外資公司競爭（例如銀行業，媒體），買呢類上市國企股票，好似踢足球射十二碼，一係買，一係唔買！上市國企嘅高管全由中共組織部調派，搵邊個做明或做暗嘅黨委書記，話都冇咁易，反而將來必定推行嘅上市民企設黨委，就要用啲手段，譬如點都要表面上做到合乎公司法，黨國先做民企股東，掌握一定數目嘅股票，然後派人入董事局，明為非執董，實則係黨委！又或者示意民企委任某某人做獨立非執董，呢個人入咗局就係實際上嘅黨委。此乃有中國特色的資本主義辦事方式，黨係要控制一切，理得投資者買唔買民企股票！