宋仲基同宋慧喬嚟緊禮拜二喺新羅酒店擺酒，上個月動主播阿仙遊首爾，專程去酒店遊咗轉，淨係韓屋建築嘅正門已經好有傳統特式同氣派！早前有報道指雙宋喺新羅酒店場租要58萬港幣起跳，但係唔同月份，其實都有唔同嘅婚禮套餐，阿仙就問咗2018年上半年擺酒嘅最低消費，原來係可以用更抵嘅價錢租到星級嘅場地！
新羅酒店嘅婚禮部喺地庫，搭升降機落到最低層，轉右直行就到。婚禮部職員話畀阿仙知，婚禮套餐收費係分四季，佢就介紹咗2018年1至3月同4至6月嘅資料。婚禮套餐是以賓客最少有200人為基礎，收費包括租場費、餐飲、佈置、音響等，擺下午或晚上同樣係3小時。2018年1至3月擺酒嘅最低消費係5千200萬韓圜(約36萬港幣)，而4至6月係6千700萬韓圜(約46萬港幣)，都比宋雙揀嘅10月平。
雙宋擺酒，相信唔少粉絲都想去見偶像一面，究竟咩位置會有機會睇到呢？睇返新羅酒店嘅格局，由鬼咁長樓梯上到頂，就係停車場，直行到迎賓館，右邊係酒店，左邊係免稅店。最近梗係企喺停車場等雙宋到場啦，但係當日保安鬼咁嚴，畀人趕嘅機會相當大。至於免稅店同迎賓館都有段距離，想話扮買嘢，實質「目及」嘢都難啲。或者你話，「有錢就是任性，租酒店房咪得囉！」但係都講彩數，因為間房未必係高層，窗口又未必對正迎賓館，如果戶外會場搭建帳篷，就真係晒錢得個吉！
《仙遊首爾》重溫： http://hk.apple.nextmedia.com/enews/animation/kfans/
記者：阿仙
攝影：峰
編審：Kaman