周五NBA常規賽，馬刺喺全隊命中率低至33.7%嘅情況下，作客爆冷以87:114不敵魔術，四連勝走勢告終之餘，今季不敗金身亦被打破。
馬刺前鋒阿域治（LaMarcus Aldridge）今場表現失準，上半場9射5中得12分，而佢嘅隊友夾埋35射7中，命中率得20%，令馬刺喺半場已經落後34:61，當魔術後衞科尼亞（Evan Fournier）喺第三節只打三分鐘左右，就射入三分期搏到罰球後，更一度將領先優勢擴至36分。
雖然阿域治最後交出「雙雙」24分11籃板，拍檔加素（Pau Gasol）亦貢獻12分11籃板，但馬刺最終以27分之差落敗。阿域治賽後話：「我哋嘅防守唔夠嚴密，進攻亦唔夠好。兩樣嘢加埋，就令球隊大敗而回。」