美國高爾夫球手活士（Tiger Woods）禮拜五喺美國承認自己魯莽駕駛，不過仍然只係獲判一年感化，只係需要按規定參加藥物治療計畫，同埋進行藥物檢驗就OK，連監都唔使坐。
事發喺今年5月，活士喺美國佛羅里達州嘅屋企附近俾警察截停，當時佢雖然揸住自己架平治，但俾警察發現佢瞌埋眼，似瞓緊覺多過揸緊車。警察當時叫活士落車試下行直線，但係唔多work，再試多次嘅結果都係唔理想。警察之後叫活士讀生字同埋重覆警察嘅指示，活士就九唔搭八咁話「警察叫佢唔好倒轉唱國歌」。
之後嘅毒物報告顯示活士體內當時殘存多種藥物，同時亦服食過大麻。不過，州檢察官最後只係要求活士參加藥物治療計畫，同埋進行藥物檢驗，仲話由於佢已經完成咗50個鐘頭嘅社會服務令，只要乖乖完成計畫，就連魯莽駕駛嘅控罪都唔使留案底。州檢察官之後亦都警告活士，如果唔合作參加有關嘅計畫，亦會撤銷感化令，同埋判佢坐監90日。
現年41歲嘅活士生涯曾經贏過14項大滿貫錦標，但最近嘅一次都已經係2008年嘅事。