青年事務委員會主席劉鳴煒雖然係唐營人，但係佢喺梁振英年代都受重用，梁振英仲促成劉鳴煒捐咗成五千萬美金，畀梁振英大仔梁傳昕做博士後研究嘅卡羅琳醫學院，不過今時唔同往日，特首換咗做林鄭月娥，自然改為支持林鄭喇！佢噚日出席播道兒童之家舉辦嘅無家青年18歲嘅困局研討會，講到青年政策時候，佢就批評前朝青年政策過於偏重主流青年，期望林鄭將青年事務委員會改組為青年發展委員會後，可以推出更關注非主流青年人問題嘅政策。
至於梁振英冇做特首之後，自然冇以往咁成日曝光，但假假哋佢係政協副主席、國家領導人，好多團體仲會請佢做嘉賓，好似噚晚佢就去咗警察員佐級協會成立40周年酒會，仲好受在場嘅人士歡迎㖭！