立法會內務委員會噚日選新年度嘅行政管理委員會成員，結果就冇驚喜可言，不過睇選舉結果就相當有趣。行管會主席係立會主席做，而內會正副主席亦都係行管會必然成員，剩番10個位由議員互選。噚日民主派有4人落場，包括民主派會議召集人莫乃光、工黨張超雄、民主黨黃碧雲同公民黨陳淑莊，建制派就有7個人參選。
八方見現場有18位民主派、30位建制派。建制派咁多人，7名參選建制派候選人梗係順利連任啦。而4位參選嘅民主派入面，最低票嘅係超雄只得19票，建制派擺明要踢走超雄，但總算有1位建制派冇跟大隊投，送咗1票畀佢。至於碧雲、Tanya各有22票，莫乃光仲勁，有23票。睇完呢個選舉都只能慨嘆，建制派真係把持咗議會咯。