噚日香港最多人講嘅事，其中一單一定係抽iPhone X，抽到嘅怕且同抽到公屋居屋一樣好開心，但有唔少人抽唔到就㷫過火屎，其中一位就係香港資訊科技商會榮譽會長方保僑。
方保僑噚日下晝3點前同唔少人一樣，捕住開售一刻，佢仲成功㩒到256GB太空灰版本，仲cap埋圖上fb晒命。點知兩個鐘後，佢由天堂跌番落地獄，事關佢同好多人一樣，都收到蘋果通知張信用卡用唔到，真係灰過太空灰。不過方保僑冇放棄，佢打埋去客服熱線，點知熱線冇人聽，連留言都唔得，激到佢上太空咁滯。
至於其他政界中人又有冇抽iPhone X呢？公民黨黨魁楊岳橋就笑笑口話哪有錢呀！反而經民聯林健鋒神神秘秘話，已經有人幫佢㩒咗喇！