被外界視為「梁粉」嘅市建局主席蘇慶和噚日出席市建局喺中環中心嘅社區空間「H6 CONET」開幕禮，乜H6 CONET咁熟口面？諗一諗先記得，H6 CONET同特首林鄭競選口號「WE CONNECT」好似，難免令人猜測蘇慶和係咪想轉飯鑊，由梁粉變奶粉？
八方相信蘇慶和自己都諗到有人會咁估，所以佢致辭嗰時，特別提到社區空間H6 CONET名字嘅由來，話C、O、NET係分別代表社區、公共空間同網絡，又強調個名並唔係抄襲林鄭競選口號WE CONNECT，唔知驚人話佢抄林太口號、定驚人話佢擦奶媽鞋？
黃偉綸：佢潛意識受影響
不過，發展局局長黃偉綸喺同一場合致辭嗰時，就繼續拎H6 CONET同WE CONNECT講笑，特別提到市建局響「樓宇更新大行動2.0」嘅幫助，仲話市建局要自掏腰包出行政費，感謝蘇主席同韋志成總監係喺呢條路上同政府「同行」，仲講笑話好相信蘇主席冇抄襲林鄭口號，但估計個口號對佢潛意識可能有影響，反映大家都明白連繫社區嘅重要。
噚日H6 CONET正式開幕，呢個社區空間有成2.8萬平方呎，市建局足足花咗成年翻新，市建局規劃及設計總監區俊豪話，嗰度以前主要出租畀社會服務團體，只有唔夠兩成空間可以畀公眾使用，翻新後就增加到四成空間可以畀公眾休息、hea吓，亦有地方可以畀人租用搞活動，咁街頭演唱得唔得？區俊豪話最緊要尊重其他人，如果要演唱就最好租用場地啦。
李八方